Correr é unha actividade sempre saudable, que non depende do lugar onde nos atopemos, nin da idade que teñamos, nin de que sexamos visitantes ou autóctonos... É unha forma de coidarnos e ao mesmo tempo unha oportunidade para coñecer e gozar da nosa paisaxe. Está claro que é beneficioso en todos o sentidos pero o certo é que é moito máis...verdade?

Seguro que se che gusta o running máis dunha vez preguntarías a outros afeccionados que é o que máis lles gusta de practicar este deporte e con toda seguridade o abanico de respostas é tan colorido como o son as propias persoas interrogadas.

 

Para nós, o mellor desta proposta de running é que saias aí fóra e goces á túa maneira da natureza, de O Morrazo, nunha ruta absolutamente espectacular e que ofrece múltiples variacións en función do tempo e do esforzo que esteas disposto a empregar.

Por suposto e como imaxinarás, esta ruta non obriga a percorrela a toda velocidade, podes elixir tamén coller a bici ou dar un paseo andando para disfrutala, calquera opción será boa, tanto se vas a 2 como a 20km/h.

RUNNING CABO HOME: 8KM

Erguémonos cedo e acompañamos ao lugar de partida ao noso compañeiro Diego, afeccionado ás carreiras de montaña e membro do Clube de Montaña Xesteiras. Alí, en Donón, en plena Costa da Vela atópase un dos lugares máis fermosos do Morrazo.

Se xa estiveches aquí sabes do que falamos: é imposible non deterse durante un intre a botar unha ollada ao horizonte, xunto á Caracola (unha obra moi popular do escultor Lito Portela), coas Illas Cíes á nosa esquerda, o Atlántico aberto até o infinito, e á nosa dereita O Monte do Facho, un vello coñecido e outro punto destacado nas nosas excursións.

Co coche no aparcadoiro apuramos a auga do noso botello que sempre ten que acompañar a todo bo runner ou excursionista e articulamos o percorrido. Onde imos?. Non hai unha única resposta, e ademais somos galegos así que respondemos preguntando de novo: Canto tempo tes?, ou ben, Cantos km estás disposto a percorrer?. E por iso (e por moito máis, que logo verás) estamos en Cabo Home. Porque tes a opción de facer unha ruta circular ao longo do cabo, ou perderte nas súas ramificacións, e para os que estean realmente en forma, sempre está a opción de dar máis dunha volta, como adoita facer Diego, ata que tivo suficiente.

 

En Wikiloc podes ver de forma xeolocalizada a ruta que afrontamos neste espléndido día de verán, cun total de 8km de distancia e 164m de desnivel acumulado. Algo que ao ritmo de gacela de Diego é todo un reto para nós, e máis con tanto calor! Se queres ir máis fresco e ademais campar ás túas anchas, aconsellámosche empezar cedo, se non terás que compartir o camiño con ciclistas, excursionistas e corredores e até domingueros!. E é que a ruta segundo días e horas é bastante transitada porque, simplemente, é impresionante.

PREPARADOS, LISTOS... XA!

Unha vez deixamos atrás o miradoiro xunto á Caracola e avanzamos pola pista á beira do cantil, o número de persoas diminúe, así que podemos gozar mellor da banda sonora: o mar rompendo contra as rochas. Ao longo dos primeiros 2km atoparemos tramos relativamente duros con costas suaves pero que supoñen un primeiro desafío e alertan sobre o que está por vir.

O chan brando e de terra permítenos correr comodamente por un carreiro ben trazado e protexido dos vehículos. Tras esas primeiras costas, chegamos a unha zona máis chaira, lugar onde nos acomodamos, sen darnos conta, a un ritmo que nos permitirá ladear a cabeza e observar o espectáculo que nos rodea: mar aberto, as Illas Cíes, e os faros do cabo.

FAROS E CORES

Sempre correndo á beira dos cantiis, os faros vanse achegando ata que, de maneira inequívoca, teremos que afastarno da ruta principal para descender até o Faro de Cabo Home, esa torre esvelta, branca, que se erixe ante o Atlántico e que divisamos de lonxe desde o inicio da ruta.

Neste punto da travesía o firme cambiará, non soamente por afrontar unha costa abaixo pronunciada senon porque o chan de terra se intercala cun pedregal no que deberemos andar con moito ollo. Os ciclistas adoitan divertirse nesta parte do camiño e cando hai grupos, é frecuente que se luzan con pequenos saltos, entre moitas risas e alboroto. Nós puidemos vivilo ao atoparnos, entre outros, á xente de atranca2, que amenizaron, máis se cabe, o noso día de running.

Alcanzado o Faro de Cabo Home, podemos presumir de estar no punto terrestre máis próximo ás Illas Cíes, e a verdade é que sentimos que case podemos tocalas coas mans!. Desde aquí temos a tiro a baliza de Punta Robaleira, unha torre moito máis baixa e ancha que a anterior e coñecida como o Faro Vermello, porque aínda que é de mampostería está pintado dun vermello rechamante que destaca sobre o ceo e mar azuis, e que che convida a seguir correndo, esteas como esteas de forzas, cunha especie de atracción magnética...

Esta parte do percorrido é se cabe máis impresionante que a anterior xa que transcorre realmente á beira dos dos cantís e a través dun terreo de esixencia e irregularidade notables. Probablemente agora empeces a sentirte canso, e se non o fixeches, tranquilo, aínda falta un pouco máis!

CARA MELIDE E O ÚLTIMO FARO

Cando chegamos a este punto correriamos xa case 5km e será momento de botar un bo grolo de auga e continuar cara á única praia da costa de Cabo Home, Melide, quizais a praia máis salvaxe de todo O Morrazo. A vista da praia obrigaranos a parar uns instantes para contemplala, ocasión que podemos aproveitar para facer avituallamiento no seu "chiringuito " ou simplemente refrescarnos na fonte que atoparemos no camiño.

Agora quédanos realmente moi pouco até alcanzar o seguinte obxectivo, o faro de Punta Subrido. Monte a través, cruzando entre os piñeiros, afrontamos unha última costa arriba que superaremos con forza, sabendo que a só uns metros espéranos o último do tres faros. A primeira vista parecerache moi similar ao faro de Cabo Home, pero é algo máis baixo e se te fixas, verás que as xanelas son só 2, e non 3 como ten o seu irmán maior.

Ao pé do faro, fronte ao mar, poderemos decidir se queremos xa regresar cara ao punto de partida, onde deixamos o coche, o que supón percorrer aínda 3km por unha pista forestal paralela á anterior, con varios tramos en costa, entre eucaliptos e vexetación autóctona ou se, pola contra queremos aínda máis marcha, porque temos máis opcións, por exemplo achegarnos até as praias de Barra e Viñó, que se advirten desde o faro de Punta Subrido, aventura que rematará inevitablemente cun refrescante baño! Ou, para os que se tomen moi en serio isto do running, está a opción de repetir unha ou máis voltas completas...

Fagamos o que fagamos, unha vez deixemos de correr e vaiámonos á nosa casa, alí darémonos conta de que ese famoso dito de que "a recompensa era o camiño" cúmprese en Cabo Home máis que en ningún outro lugar que coñezamos, e dos moitos que coñecemos no Morrazo. :)